| बिहिबार, मंसिर १६, २०७८

साफ च्याम्पियनसिप: नेपाल र भारत फाइनलमा भिड्ने

काठमाडौँ । माल्दिभ्समा जारी साफ च्याम्पियनसिप २०२१ को उपाधिको लागि नेपाल र भारत भिड्ने भएका छन् । बुधबार भएको दोस्रो खेलमा भारतले आयोजक माल्दिभ्सलाई ३–१ को नतिजा निकाल्दै अन्तिम दुईको यात्रा तय गरेपछि नेपाल संग भेट पक्का भएको हो ।

भारतको जितमा कप्तान सुनिल क्षेत्रीले २ तथा मनवीर सिंहले एक गोल गरे भने माल्दिभ्सका अलि अश्फाकले एक पेनाल्टी गोल गरेका थिए ।  भारत प्रतियोगितामा अपराजित यात्रा कायम राख्दै शीर्षस्थानमा रहेर फाइनल पुगेको हो ।भारतले ४ खेलमा ८ अंक जोड्यो । भारतले यसअघि नेपाललाई १-० ले पराजित गरेको थियो भने श्रीलंका र बंगलादेशसँग बराबरीमा रोकिएको थियो ।

बुधबार जारी लिग चरणको अन्तिम खेलमा १० खेलाडीमा समेटिएको बंगलादेशसँग १-१को बराबरी खेलेर नेपाल पहिलोपटक साफ च्याम्पियनसिपको उपाधि होडमा पुगेको थियाे । नेपालले ४ खेलमा ७ अंक जोड्दै उपविजेताको रुपमा फाइनल पुग्यो ।

याे नेपाल र भारतको पुरुष राष्ट्रिय फुटबल टोलीबीच २८ वर्षपछि फाइनल खेल तय भएको हाे । सन् १९९३ मा बंगलादेशमा भएको छैटौं सागमा नेपाल र भारतबीच स्वर्ण पदकका लागि प्रतिस्पर्धा भएको थियो । जसमा नेपालले बाजी मारेकाे थियाे ।

फाइनल खेल आगामी शनिबार राति हुनेछ ।

प्रतिक्रिया दिनुहोस्