मृत बच्चा र सुत्केरी श्रीमती छोडेर श्रीलङ्का पुग्थे बालेन

-महेश वस्नेत

दुई वर्ष अगाडि बालेनको बारेमा मैले गरेको टिप्पणीका कारण मेरो निर्वाचन प्रभावित भयो भन्ने कुरा अहिले पनि म सुन्ने गर्दछु । बालनजीले काठमाडौँ महानगरपालिका सम्हालेको दुई वर्ष नाघेको छ । चुनावको बेलामा बालनजीले हरेक विषयलाई सहजै र सजिलै पुरा गर्ने भन्नुहुन्थ्यो । जनताले पत्याएर भोट पनि हालिदिए ।

उहाँले भन्नुभएको स्मार्ट ट्वाइलेटको हालत अहिले कुन अवस्थामा पुगेको छ ? इन्फ्रास्ट्राक्चर एम्बुलेन्सको हाल खबर के छ ? बेस्मेन्ट खाली गरेर सबै पार्किङ व्यवस्था गर्ने भन्ने कुरा कहाँ पुग्यो ? फोहोरको व्यवस्थापन गरेर काठमाडौँलाई हराभरा बनाउने आश्वासन कहाँ पुग्यो ?

तपाईँले तोडेर अलपत्र पारेको टुकुचा कसले बनाइदिने हो ? तपाईँले फोडेर अलपत्र बनाएका संरचनाहरू कसले बनाइदिने हुन् ? त्यसमा काठमाण्डौं बासीको सम्पत्ति कति नष्ट गराउनु भइसक्यो ? तपाईँ ले गरेको निर्माण चाहिँ के के हो ? काठमाडौँ महानगरको विकास बजेट किन १६% भन्दा खर्च गर्न सक्नु हुन्न ? तपाईँ लोकतान्त्रिक मेयर हो वा निरङ्कुश ? लोकतान्त्रिक मेयर हो भने नगर सभा किन ह्यान्डल गर्न सक्नुहुन्न ? सबैको बिचार र भिजनलाई किन सम्मान गर्नु हुन्न ?

अघिल्लो वर्ष श्रीमती चढेको गाडी ट्राफिकले रोकिदियो भनेर आक्रोश सोसल मिडियामा पोख्नुभयो र सिंहदरबार जलाउँछु भन्नुभयो। तपाईँ अराजक मात्र होइन भावना मरेको असामान्य हरकत गर्ने मान्छे हो भन्ने कुराको पुष्टि हो त्यो ! त्यही बेलामा तपाईँको श्रीमती सुत्केरी भएर दुई वटा बच्चा जन्मेको भन्ने सहानुभूति लिन र आलोचना बाट बच्न खोज्नुभयो । दुई वटा बच्चामध्ये एउटा बच्चा बचाउन सक्नुभएन भन्ने कुरालाई हामी सबैलाई दुःखी बनायो। तर तपाईँ भने श्रीलङ्कामा रातारात पुगेर क्रिकेट हेर्न जानुभयो। सुत्केरी श्रीमतीको स्याहार र मृत बच्चाको अन्तिम संस्कार तपाईँको स्टन्टबाजिमा प्राथमिकतामा परेनन् !

वसन्त नेम्वाङ भौतिक मन्त्री र केपी ओली प्रधानमन्त्री भएको बेलामा बनाएको बिजुली बजारको आर्क पुलमा फुल रोप्ने काम गरेर केपी ओली सरकार हुँदा समृद्ध सहर निर्माण अभियानमा ४ अर्ब खर्च गरेर बनाइएको बाटोमा रङ्ग लगाउने र बत्ती जोडेर आफैले सबै गरेको जसरी चर्चा गराउनुभयो । तपाइले गरेका ५ वटा पूर्वाधारका काम के के हो भनेर कसैले सोधेमा दिने जवाफ तपाई सँग छैन ।

पब्लिक सेन्टिमेन्टलाई दुरुपयोग गरेर सोसल मिडियामा वार रुम चलाएर केही अराजक समूह परिचालन गरेर आफ्नो प्रशंसा आफैले गर्न लगाएर तपाईँ निकै नै मात्तिनु भएको छ । सोसल मिडियाले बनाइदिएको चर्चाको आयु कति हुन्छ भन्ने कुरा राष्ट्रिय स्वतन्त्र पार्टी र रबी लामिछाने बाट सिके भयो होला नि ?

तपाईँले चलाएको रुटिन अफ नेपाल बन्द, ट्रोल नेपाल, जोक्स नेपाल जस्ता साइटहरू तपाईँको पक्षमा र अरूको विरुद्धमा साइबर क्राइम आकर्षित हुने गरेर परिचालित भएको कुरा सबैले सूचना राखेकै छन्।

हिजो दिनभरका वर्षाले काठमाडौँ उपत्यकाका सबै नदीहरू जलमग्न भए सडकहरूमा अवरोध भयो । त्यतिखेर स्थानीय तहको नेतृत्व गरेको मेयर राहत र उद्धारमा खट्नुपर्ने बेलामा तपाईँ दिनभरि इन्जोय गरेर बस्नुभयो । खान नहुने कुरा र तान्न नहुने कुरा तानेर बस्नुभयो भन्ने काठमाडौँ बासीको गुनासो छ।

काठमाडौँ बासीले तपाईँको विरुद्ध अभिव्यक्ति दिन थाले। कतिका मोटरसाइकल डुबे कति सडकमा अलपत्र परे भत्केर टुटेका सडकहरू सामाजिक सञ्जालमा पोष्ट गरेर वा बालेन सिटी भनेर उडाए । तपाईँको लोकप्रियता मापन घटेको अनुभूति भएपछि दिउँसो नशाको सनक राति चढेर तपाईँले केपी शर्मा ओलीज्यूलाई गाली गर्दै गिरिबन्धु टी स्टेट तर्फ कुरा मोडेर काठमाडौँमा नभएका सारा विकासको दोष उहाँलाई लगाएर आफू पानी माथिको ओभानो बन्ने प्रयत्न गर्नुभयो । स्मरण होस् आधुनिक काठमाडौँको विकास पूर्व मेयर केशव स्थापितले गरेका हुन्। खोलाको भागलाई चौडा गर्ने र कोरिडोर निर्माण गर्ने कुरा केपी शर्मा ओलीज्यू प्रधानमन्त्री भएको बेलामा सहरी विकास मन्त्रालयले तीव्र गतिमा अगाडि बढाएका कामहरू हुन् ।

विद्यासुन्दर शाक्य मेयर भएको बेलामा काठमाडौँका सबै सडकहरूको स्तर उन्नति गर्ने र कोर एरियामा परम्परागत ढङ्गले सहरको विकास गर्ने कुरामा तीव्रता पाएको हो। धरहरा केपी ओलीकै पालामा बनेको रानीपोखरी दरबार स्कुल जस्ता आधुनिक संरचनाहरू केपी ओलीकै पालामा बनेका हुन् ।

आज त्यही धरहराको अन्डरग्राउन्ड पार्किङ प्रयोग गरेर वाह बालेन भन्न लगाउनु भएको छ। तपाईँका यस्ता नौटङ्की र हरकत अब धेरै दिन टिक्ने छैनन् । मधेसीको छोरो भएर अधिकांश मधेसीहरू प्रतिनिधित्व गर्ने कवाडी व्यवसायीलाई आक्रमण गर्नु भएको छ । सुकुम्वासीहरूलाई कुनै विकल्प नदिएर लखेट्नु भएको छ । न्यु रोड पुतली सडक बानेश्वर जस्ता व्यापारिक हबहरू अलपत्र बनाएर अर्थतन्त्र चौपट पार्नुभएको छ। बिना विकल्प फुटपाथ व्यवसायीलाई लखेट्नु भएको छ । करिब ५ लाख लाई रोजगारी दिएका साना व्यवसायी भागाभागमा परेका छन् । सोसल मिडिया बाहेक मिडिया फेस गर्न सक्नुहुन्न। काठमाडौँ जनतालाई भेट्ने हिम्मत छैन। लुकी लुकी भागी भागी हिँड्नुहुन्छ । दुई चार वटा ठाउँमा बसेर खान नहुने कुरा खाएर सन्केर उत्तेजनामा आएर अरूको उग्र विरोध गर्ने बाहेक केही गर्नु हुन्न भन्ने आरोप मान्छेले लगाउन थालिसकेका छन् ।

तपाईँलाई केपी शर्मा ओलीज्यूमाथि प्रश्न उठाउने कुनै नैतिक अधिकार छैन। जहाँसम्म गिरिबन्धु टी स्टेटको कुरा छ। राज्यले कुनै पनि उद्योगले उपयोग गरेको जमिनलाई हद भन्दा बढी सट्टापट्टा गरेर अन्यत्र जग्गा खोजेर उद्योग हस्तान्तरण गर्न सक्छ भन्ने मान्यताका आधारमा गिरिबन्धु टी स्टेटको जमिनको सट्टा भर्ना या बिक्री गर्ने निर्णय तत्कालीन सरकारले गरेको हो। सर्वोच्च अदालतले त्यो निर्णय कार्यान्वयन नगर्नु भनेर आदेश गरिसकेको सन्दर्भमा त्यो विषय उठाएर एमालेको बदनाम गर्नुको कुनै अर्थ छैन ।हिम्मत छ भने अख्तियार राज्यका निकायहरूमा कारबाहीको विषय बनाउँदा भयो। नवउदारवाद र पपुलिस्ट शक्तिहरूको हालत के हुन्छ भन्ने कुरा युक्रेनको राष्ट्रपति जेनलेस्की पाकिस्तानको पूर्व प्रधानमन्त्री इमरान खान र दिल्लीका मुख्यमन्त्री केजरीवालको हालत हेर्दा पुग्छ । त्यही भएर काठमाडौँ जस्तो महानगरपालिकामा हामीलाई नयाँ जेनलेस्की चाहिएको होइन । तपाईँका यस्ता हर्कतहरु काठमाडौँ बासी र युवाहरूले प्रतिरोध गर्नुपर्ने र आन्दोलन गर्नुपर्ने स्थिति सिर्जना भइरहेको देखिँदै छ। यो तर्फ सचेत हुनुहोला । काठमाडौँ बासी र युवाहरूले आन्दोलन र प्रतिरोध गरे भने तपाईँ र तपाईँका वरिपरिका चाटुकारले थेग्न सक्दैनन् चेतना होस्।